Google+ Followers

2015年12月1日 星期二

赦免

前幾日係美國感恩節, 睇新聞見到美國總統奧巴馬响白宮花園舉行赦免儀式。不過佢唔係赦免ISIS恐怖份子者或者囚犯, 係赦免隻火雞免被送入焗爐做慶節佳餚奧巴馬學教皇嘅祝福手勢, 作狀喺隻火雞身上劃十字表示朕赦你不死佢仲好得戚語帶相關, 好感慨咁話: “我任期將至火雞不飛, 但時光飛逝搞到在場佢兩位千笑不停口, 大讚老爸子超幽默褒姒見到周幽王烽火戲諸侯都冇笑得咁開心

今次有幸俾奧巴馬選中赦免隻火雞名叫「誠實」(Honest)。 除咗「誠實」仲有另一隻叫「亞伯」(Abe)嘅火雞做後備, 如果「誠實」有乜東瓜豆腐中途瓜咗, 就用「亞伯」補上, 即係整番個副總統咁話。 但如果「誠實」無災無難渡過感恩節, 咁「亞伯」呢隻後備就要拎去劏。兩隻火雞名字係經加州學生投票表決選出, 夠晒民主。奧巴馬正義上身, 唔只悲天憫人, 仲憐憫埋雞, 同記者話: “雖然「誠實」睇落都幾美味,但兩隻火雞都係經民眾投票表決選出, 所以另一隻「亞伯」都要一齊赦免,兩隻火雞齊齊放條生路俾佢地行, 感恩節後送去農場頤養天年, , 呢啲就叫做民主。咁荒謬嘅嘢都講得出, 真係唔怕笑甩人下巴。

美國佬開口埋口話要宣揚民主, 其實做起事嚟就N重標準, 想做世界警察, 但行事又十分霸道, 順我者昌, 逆我者亡。 口就話要維持世界和平, 實則到處收買馬仔, 撩事鬥非, 翻雲覆雨, 攪到世界立立亂。 其實大節流流, 奧巴馬你食火雞冇人會話你唔啱, 不過唔駛作狀做戲赦免火雞扮仁愛 咁做同羅馬競技場嗰位暴君尼祿」冇乜分別, 舉起手指公用thumbs up或者thumbs down, 擺明「君要臣生就生, 要臣死臣不得不死」。

網上有兩段奧巴赦免火雞嘅短片(附於本文末), 睇見「誠實」獲赦後响白宮草地踱步, 觀禮賓客個個面帶慈祥, 有啲人同「誠實」掃下羽毛, 有啲好溫柔咁摸下佢, 愛心爆晒棚。但唔知點解我睇完呢個畫面, 並冇感動到心中湧起一股暖流, 反為好似梁唐青儀咁倒抽一口涼氣, 心中一陣悲傷。

講真我冇嘢擔心, 至怕係我地嘅習大大呢排頻頻出國訪問, 飲多咗幾啖洋水, 興起上嚟東施效顰, 攪番個中華感恩節, 响天安門廣場表演一赦免北京填鴨大戲。到時舉國上行下效, 平民百姓紛紛興起赦免善行, 連老鼠甴曱蚊滋都放生。真係一人得道, 雞犬升天咯。

其實好多人等緊習大大赦免, 排隊都未輪到填鴨啦。
 
 
注解感恩節是美國和加拿大的全國性節日,為感謝上天賜予一年豐收的祝福外,更有因當年五月花號船滿載英國清教徒到達美洲時,不少人饑寒交迫,染病身亡,在印第安人幫助下,新移民學會狩獵、農耕,才得以在新家園重生,也因此設立感恩節、感謝幫助之人。1963年,時任總統甘迺迪開啟白宮主人赦免火雞的慣例。來自美國火雞協會的數字顯示,美國人每年感恩節吃掉約4600萬隻火雞。