周末樂一樂

依家手機流行, 人手一隻, 大家對住Whats App日寫夜寫, 寫到悶連字都費事打, 傳個符號算數: 笑面配隻心、豎起隻手指公、送香吻、合掌感謝、扮怒容、送朵花...。如此落去, 睇怕文字好快就失傳, 好多文化都成為古董。

轉眼周末又到, 係時候輕鬆一下, 請大家收埋手機, 一齊玩個遊戲, 試試大家仲記得幾多中文。以下有二十幅圖, 每幅都代表一句成語。好易啫, 動下腦筋啦。睇嚟我都唔使俾答案, 相信好多朋友都識嘅, 等佢地揭曉啦。

猜成語好嘥神, 唔想玩嘅朋友就睇睇以下一則笑話啦: 

＜偷雞記＞

一名工程師求職多時仍找不到工作, 最後決定自己開診所搵食。他在門口貼上告示: 「三百蚊包醫疑難雜症, 醫唔好賠一千蚊。」

大強讀完告示後靈機一動, 心想是時候可以敲詐一筆了。於是推門入診所。

大強: "我最近食嘢食而不知其味。"

工程師: "護士姑娘, 去22號櫃統攞藥水滴三滴落佢口啦。" 護士滴上藥水。

大強: "嘩, 點解喺電油咁嘅味道架?"

工程師: "恭喜晒, 咁你回復味覺啦。盛惠300蚊。"

大強離開診所後心有不甘, 隔幾天又來診所打算收復失地。

大強: "我最近記性好差, 可能患咗失憶症。

工程師: "護士姑娘, 去22號櫃統攞藥水滴三滴落佢口啦。"

護士滴上藥水。

大強: "吓, 呢隻喺醫味覺藥喎, 有冇搞錯呀?"

工程師: "恭喜晒, 你回復記憶力啦, 診金三百, 唔該。"

大強條氣唔順, 幾天後再度上門。

大強: "我嘅視力愈來愈弱, 點算好?"

工程師: "對唔住, 呢味嘢我都唔識醫喎, 咁賠你一千蚊啦。" 接著給大強遞上鈔票。

大強: "吓, 呢張係五百蚊紙嚟啫喎!"

工程師: "喺喎, 對唔住。唔覺意攞錯咗添。不過恭喜晒, 你回復視力啦... 盛惠三百蚊。"

呢啲就喺偷雞唔到蝕咗把米。不過你估大強會唔會再接再厲, 再翻嚟耳、喉、手、腳、心、肝、肺、胃、肚、腎...睇勻全身? 有橋就不妨教路等我去敲翻一筆都好。

祝周末愉快!