幻日手記

近來成日俾老妻鬧我扮聾唔聽佢支笛; 好多朋友又話我囂張咗, 叫早晨都唔瞅唔啋, 借咗聾耳陳隻耳, 以為我驚死佢地想同我借錢｡ 查實係冤哉枉也｡ 年紀愈大, 發覺聽覺愈來愈退化, 對社交生活造成好多誤會同不便｡ 於是的起心肝去配隻助聽器｡日前行入助聽器舖頭, 問店員有乜又平又正嘅好介紹｡佢話兩蚊到兩千蚊都有, 豐儉由人｡我當然要兩蚊至平嗰款啦, 同錢有仇咩? 店員同我掛條線落頸處, 佢話: 插隻耳塞落耳仔, 再拖條線插入裇衫袋口就OK嘞｡我問佢點解冇聲嘅? 佢話: 兩蚊雞隻梗係冇聲啦! 不過, 人地見到你心口條電線, 一睇就知你係聽覺殘疾人士, 自然會大聲同你講嘢啦｡諗落又好有道理, 兩蚊雞就可以等人大聲啲同自己講嘢, 唔使“吓､吓”聲要人地重複講, 你唔煩人地都煩啦｡卡都費事簽, 攞張八達通“嘟”一聲扣兩蚊搞掂｡

於是戴住隻道具助聽器四圍蕩, 瀏覽下城市嘅光景｡行行下入咗油麻地廟街｡好日都唔會去廟街, 費事俾啲鳳姐截住叫聲靚哥拉我上樓談心, 入咗房聾聾地兩個牛頭唔搭馬咀棧嘥氣, 做唔成生意慢下手仲俾人打一身｡不過行咗好耐都冇嬌娃兜搭, 反為眼前一亮見到座牌坊, 咁大個仔依家先知到原來廟街有個咁重文化氣息嘅地標｡牌坊有對楹聯: ｢廟貌莊嚴信善虔誠香火盛, 街頭熙攘人群歡樂貨財豐｣｡聽落願景都幾進取同樂觀, 希望係咁啦｡
 

轉個彎又見到一間麻雀舖, 店牆上有一幅壁畫, 國際巨頭埋堆打雀局, 四家都叫緊大牌｡奧巴馬單吊等緊九萬混一色對對碰, 佢個馬仔安倍諗住摸隻九萬然後鬆張俾大佬食舖杰嘅擦下鞋, 點知俾習大大自摸隻九萬食出花么九｡奧巴馬當堂面燶, 本來佢皮膚已經夠黑, 條氣谷到塊面黑過墨斗｡肥仔金隔岸觀火笑到見牙唔見眼｡習大大好得戚, 開心過打低咗十隻貪污大老虎｡不過佢唔俾狼震鷹落場, 無謂689忽然落台到時唔知搵邊個頂佢個位, 費事尶尬囉｡
 

轉入橫街, 嘩, 好多舖都有鎮店之寶｡老婆唔準屋企養貓狗, 所以我唯有出街睇｡講真, 望住成車木面機械人低頭玩手機火都起, 望下貓狗趣緻嘅樣仲開心｡
 

大叔, 貓都有肖像權架, 咪見到就影, 我唔想個樣隨便俾人放上“飛屎卜”架｡
 

等等咪影住, 等我擺個三七側面上鏡啲｡

 

曾江話美源髮采最好用, 乜色都可以染｡ 佢諗緊染隻大紅色, 青春啲, 好過成日俾人叫做白髮魔女｡
 

蘋果沙田柚唔啱胃口, 下次放舊豬骨頭啦｡

 

呢隻精靈又趣怪, 殺死人冇命賠｡

 

大舊含悲望住啲俾人虐待嘅狗相片, 物傷其類｡

 

行行下入咗商場, 見到信用卡賣廣告招攬用戶｡呢條裙夠晒霸氣, 成百張卡跟身, 著住佢去濕平, 鳩烏實唔使擔心碌爆卡｡

 

 

呢間商場嘅地板好迷幻, 我喺三樓望落去, 暈暈地差啲一躍而下｡
 

望落二樓仲更加暈, 成堆蝗虫排喺名牌店門口等入場｡買完就地喺門口裝箱｡場面墟冚過佔中, 真係想落去射胡椒噴霧劑｡
 

商場逼到爆, 人篋爭路, 嗱嗱林離開商場｡點知一塊｢一目偵信｣偵探社廣告牌兜口兜面撞埋嚟｡佢話有乜債仔､老婆偷情､老公偷食､肉參, 單隻眼都可以同你摷出嚟｡咁勁? 下次立法會搵你去摷發叔翻嚟開會, 唔使成班建制派等餐懵｡仲可以摷埋個港大首席副校長出嚟上位, 唔使陳文敏左等右等咁委屈啦｡
 

條行人路又係水洩不通, 人篋爭路｡ 唔想隻腳踭俾拖篋撞損, 不如坐巴士去尖沙咀｡點知跟住前頭架巴士行足成條彌敦道｡俾前面嗰位｢港大一級榮譽､通識真正王者｣Leung Sir對懾人心魄嘅三白眼挖咗足我個成半粒鐘, 咁凌厲嘅眼神, 望住有啲心怯｡不過望望下我又忍唔住笑出嚟｡吓, 通識都有得補習? 講真, 通識其實即係夠八掛, 使乜學? 得閒碌大雙眼觀六路､豎起耳仔聽八方, 自然收到料啦｡
 

終於去到尖沙咀星光大道, 學遊客用手機Pano影番張維港照, 做個時代見證, 好命嘅話比較一下100年後維港變成點｡
 

嗱, 百幾二百年前維港係咁樣架｡

 

見到小艇有人手持魚網撈撈下, 仲以為捉緊魚｡ 望真啲艇蓬頂有塊廣告, 原來係｢佳發海港清理｣公司人員喺度撈垃圾｡今時今日仲用咁古老方法撈垃圾, 可能想俾鬼佬感受下維港舊日情懷掛｡
 

維港填海愈填愈多, 兩岸就快貼埋, 睇嚟遲下可以一步跨過對面海, 過海地鐡冇人坐｡
 

嚟到尖沙咀, 不如過埋海去IFC逛下｡嘩, 熊山熊海, 差啲又以為佔中｡
 

跟住就見到1200位｢突搜選舉委員會｣成員排住隊入場預演2017年突搜選舉｡咁聽話又齊心又有默契, 亞爺好安心囉｡
 

由中環直落灣仔影藝學院, 見到一堆蝴蝶, 唔知又有乜蝴蝶效應?
 

影藝學院賣物部入面有隻碗, 碗內有粒精子｡依稀見到自己同人海中千萬億人類嘅前身｡一粒咁卑微脆弱無助嘅浮游生物, 點解會變成千萬種唔同口面唔同性格嘅人? 而每個人都曾經打低千萬對手, 贏過一次游泳冠軍, 想起馬上重拾自信, 都值得驕傲嘅｡
 

坐巴士回家, 途中望見路邊坐滿人｡忽然間我又想起｢面書｣facebook呢樣嘢｡依家人人都玩｢面書｣, 希望可以通過大氣電波將生活向外伸展, 結交世界上千萬唔識嘅人, 分享人生｡ 其實使乜捨近求遠咁隔涉? 周街咁多人, 隨時可以走埋去截住一兩個, 當面同佢地講下自己尋晚做過乜､聽日打算做乜､今日食過乜｡ 又可以打開手機俾佢地睇下家人或者屋企隻愛貓愛犬嘅照片, 之後同佢講聲“like”, 真係friend 過打band, 溫馨到爆｡唔知咁做會唔會俾人鬧發神經呢?
 

人生有好多個站頭, 不過有啲站係唔想落車嘅｡落錯咗就“衰咗”｡
 

落呢個站就“賴嘢”｡

 

 

行咗大半日街, 有啲茫茫然, 又好似有啲幻覺, 真真假假摸唔清, 胡亂寫低幾句, 以為記｡