2015年4月27日 星期一

無答案的答案



閱畢上篇<周末下午茶>眾Blog友的回應, 現在來一個答案綜合:

A) iPhone
B) 無消費上限Credit Card
C) 歧視
D) 答案以下詩中尋:-
   回首凝望美山河
   品味人間趣味多
   田園美景碧似玉
   吾心沉醉常知足
   古人亦懷此胸襟
   吉人福地好遮蔭
   谷中無憂歲月長
   舌根常嚼菜根香

E) 24個三角型


Blog友回應當中<大夫行傳>話佢猜中n個三角型, 5個就過骨呢個答案我可以袋住先。我讚佢道行高深, 句句好玄又深奧。語言偽術家狼震鷹拍馬都追唔上。

另外<亞執>話: 嗚嘩! 我唔識, 答案又無, 三角形答1, 白癡呀, .... 
其實亞執係個大隱隱於市嘅高人, 講嘢唔會去到盡, 言有盡而意無窮, 頗堪玩味。執兄呢個回應俾咗我好多啟發, 有如醍醐灌頂, 當頭棒喝。世間咁多問題邊有"絕對"答案?! 我當時好多嘢想講, 不過一下子講唔清, 千言萬語無從下筆。可能日有所思, 夜有所夢。昨夜迷離之中竟然夢到一班人, 其中有先哲賢人, 亦都有平頭百姓, 大家喺度熱烈討論究竟有幾多隻「三角型」。

三姑舞動雙手大叫一句: , 底褲都周街漾, 一條都嫌多, 仲叫人估有幾多條。我冇眼睇!

三姑個仔: 醫生話唔好著三角褲, 長期箍住個下身男人好易不育。我只著孖煙囪。

三姑個女: 如果當比堅尼著我就嫌太多布, Cut減一半布料我就著。

畢卡索: 我搞立體主義, 見唔到三角型, 明明係一張牛頭馬面。

達利Dali條氣唔順: 邊係呢, 以超現實主義嚟睇, 明明係個圓形。

六祖惠能大師低眉善目, 合掌吐出一句: 三角本無角,三角亦非角,本來無一角,何處有三角? 善哉!

愛因斯坦: 相對嘅啫。你睇係三角, 我就話係對角切半個正方形。

霍金駁嘴話: 我對三角冇認識, 只對圓形嘅黑洞有研究。

蒙娜麗莎陰陰嘴笑住話: 咪當我區區女流唔識嘢。我梗知道有幾多個三角型啦, 不過唔話你知, 保持神秘感。嘻嘻!

諸葛亮搖下把羽扇: 我日理萬機, 幾多三角型我唔理, 我只專心搞魏蜀吳三國鼎立, 保持天下均勢。

笛卡兒話托住個腮話: 我見三角故我在。

Hamlet匿埋角落頭自言自語話: How many triangles? To guess or not to guess, that's the question. 

耶穌: 只有一個至高無上嘅三角。上帝係「天父、天子、聖靈三位一體。因此信三角得永生。

孔子皺晒眉頭勸道: 大家唔好坳三角嘅問題, 無謂鬥氣。知之為知之, 不知為不知, 是知也。互相切磋, 三人行必有我師嘛。

毛主席同習大大話: 你咪湊熱鬧玩呢啲無聊嘅三角智力測驗, 最緊要完成國家嘅宏願, 搞掂兩岸三地嘅統一。

李白都同意毛主席話三角智力測驗幼稚, 不如俾心機熟讀唐詩三百首,不會吟詩也會吟。

影壇新紥姐高妹聽唔明李白話中之意, 不過聽到「三角」呢個名詞就好緊張, 馬上澄清話佢好純品, 唔會撬人牆腳搞三角戀愛。

貝多芬耳好聾, 聽唔到大家坳緊乜東東。佢話最好搬座「三角琴俾佢奏一曲<悲愴交響樂>。

沙特: 存在主義是一種人道主義, 三角都係一種存在現象, 所以玩三角智力測驗可以證明自己嘅存在。

尼采: 沙特你好搞笑, 不過許多真理都是以笑話形式講出來的。我話Peter呢篇blog幾好笑吖。

本來仲有好多人爭住發言, 可惜我聽見尼采咁讚我, 開心到笑唔停, 咁就笑醒咗囉。

沒有留言:

張貼留言