剛讀了一段幾位老外遊客訪港後的觀感, 文中對香港讚不絕口, 認為是一片"可以居"的樂園和福地:「During the last one and a
half years, we have visited Hong Kong several times. We have been to so many
places and now I have to admit that Hong Kong
is a place where I would like to live. A year and a half ago, after visiting Singapore, I
assumed that it was the real paradise, but I was mistaking. Hong
Kong is an unbelievably beautiful city and it makes you willing to
come back. People there are kind and responsive. You feel respected no matter
if you are local or a foreigner. Moreover, the main thing for me is that I
never get bored there. The rhythm of life is comparable to Moscow. However, unlike Moscow, Hong Kong
only retained the best of it.」
生於斯、長於斯、居於斯的你對此又有什麼感受呢?
今天這個貧富懸殊兩極化、政局迷濛、民怨四起、凝聚力鬆散的社會, 可以套用一首周璇的陳年老歌作為寫照:
夜香港, 夜香港, 你是個不夜城。華燈起, 樂聲響, 歌舞昇平。
只見她, 笑臉迎, 誰知她內心苦悶。夜生活, 都為了, 衣食住行。
酒不醉人人自醉, 胡天胡地, 蹉跎了青春。
曉色朦朧, 倦眼惺忪, 大家歸去, 心靈兒隨著, 轉動的車輪。
換一換, 新天地, 別有一個新環境。
回味著, 夜生活, 如夢初醒。
閒時拍下不少城市風光快照, 雖是零散雜亂的東西, 然而砌拼之下,
倒成了一幅馬賽克(mosaic), 就如這幅玻璃小塊前的自拍照那樣, 雖然不是全豹, 也該可看出一點輪廓。今天興之所至, 就把近日累積下來的照片編排一下, 湊合為blog, 以澆一下胸中的塊壘。
＜洗腦大全＞
科技日益發達, 資訊有如鋪天蓋地洪水, 淹得令人窒息。每天起來甫踏出家門, 迎面而來便是那讓人應接不暇的資訊 ―
新聞、廣告、宣傳單張、霓虹招牌、口號、標語、電郵、facebook、WhatsApp..., 一切有如走馬燈般在眼前晃動, 稍縱即逝。眼睛不斷接收, 資料過目即忘, 腦子來不及消化, 人變得視而不見, 聽而不聞, 無暇分析, 遂至理智迷失而不再思考。
自從自由行開放後, 金舖、電器店、化妝品店、藥房和名牌旗艦店五步一樓, 十步一閣。文具店已成鳳毛麟角。某天我想買一瓶鋼筆墨水, 走遍各處都買不到。後來在商務書局找到碩果僅存的一瓶。店員說鋼筆墨水已是珍稀物品了。
讓人眼花撩亂的地產買賣廣告, 不知何去何從。
「Be my
Valentine! Feeling Love in Golden. Je t'aime.
I Love You.」
一堆虛浮的宣言, 連法文也用上了, 你能不動心?
左邊一對愛侶穿金戴銀, 右邊的性感女郎炫耀着「功能內衣」
(見LOVE一字右下副標題)。這就是"愛"的象徵。
廣告背景寫滿標題: 「終生承諾」、「承‧全愛 Love is All」、「愛意彌漫‧喜樂延承」。這是珠寶帶來的承諾。
這邊廂告訴你「愛相親; 愛相襯 --- 因為愛很美 。」 為什麼? 六福珠寶知道。
戴上此錶, 便能「超越自己, 成就未來... 致力追求完美。」 多誇浮蒼白乏力的字句!
鞏俐說: "我的肌膚始終年輕, 因為它由內煥發!" 對的,
電腦執靚相, 人人都可以是鞏俐。
「巧笑倩兮，美目盼兮，素以為絢兮」。其實, 如果缺乏美好的本質，光靠外表的模仿，結果也是枉然。
現今廣告牌愈弄愈大, 以致大廈窗口也全遮掩了。
曾江講咗幾十年, 咁洗腦法, 唔信都講到你信啦。
食完牛黃丸可以做明星, 秦沛話得你一定要相信。
我從未吃過龜苓膏, 也不會吃, 幾大招牌都冇用。
食完龜苓膏同牛黃丸, 食埋虫草同燕窩, 人唔補好易老架。
再進補食埋鹿茸、鹿尾巴、高麗參。唔爆血管至奇。
「醫療禱告服侍」? 唔知唸邊種經有效啲? 天主經、佛經、可蘭經、食經?
人人爭買名校區嘅樓。其實使乜咁破費呢? 我大仔讀「牛津」 (牛頭角政府津貼中學), 細仔讀「哈佛」(哈爾濱佛教小學)。
＜來自星星的你＞韓劇的金秀賢和全智賢紅爆環宇, 佢地都選用嘅手機, 你能抗拒嗎? 你甘願落後於人嗎?
今時今日嘅老師唔使靠實力, 無料就整靚個形象。梳番個全智賢半遮面髪型, 個個miss都喺偶像, 學生上堂人人金睛火眼特別精神, 包科科攞A++。家長們仲唔快啲同仔女報名?
呢位港大一級榮譽生Leung
sir自命係「通識真正王者」, 不過外型就冇金秀賢咁俊俏。 No
problem, 搽紅兩片朱唇戴番副圓框眼鏡, 配合懾人眼神,
真係智慧過貓頭鷹博士。
百家爭鳴, 吵吵鬧鬧, 乜嘢承諾都唔到肉。我做議員就一定為全港人民爭取政府每月派利是一萬蚊。
另一種拉布。睇下邊個會嚟剪布啦。
已經一鑊泡, 仲點慶祝呀?
耶穌說:「我來了, 是要叫人得生命, 並且得更豐盛。」
雖然係污泥中一股清泉, 但我相信呢隻標語牌最少人留意。
服裝店門前的人偶, 破裂的面貼上膠布。係話俾大家知生意難做, 慘澹經營。
呢間服裝店就話鐡定結業,
一拖再拖, 塊牌掛咗成年都未"鐡定"。不過醜婦終須見家翁, 今次鐡定「光榮」引退, 唉!
呢間執咗笠, 鋪位丟空足足六年，真係鐡定結業。
收埋冷巷一兩角, 仲要印埋N國文字。
咁作大, 你估呢度係世界博覽會咩?
呢位善心小巴司機偉大過耶穌同佛祖, 不過乘客個個低頭玩手機, 話之你塌樓天火焚城世界末日啦。
＜紙醉金迷＞
香港前水警總部改建的1881是一個小型精品商場，集名牌商店、餐廳、酒店和展覽館於一體。荷包少個錢都唔敢行入去。
唔怕生雞眼就著啦。
真係著到冇得著咯。
每次經過呢條人龍, 我嘅自卑感有如泉湧。
只係LV兩隻英文字母, 已經讓人血液奔騰, 砰然心動。你話做人唔努力搵銀、 節衣縮食, 點可以享受到呢份驕傲呢?
咪就係一塊白布, 放喺置地廣場就萬萬聲都有人買, 如蟻見蜜糖。
兩邊都是"精神"食糧, 睇你對腳想行向哪一邊。
商場舉行耐力比賽, 參賽者只要將手掌貼在車身上的手印, 可以保持接觸最長時間者便可獲贈此車(手掌稍離開手印便算輸)。上端時計顯示比賽已進行了超過五小時。我腳輭體虛, 企一分鐘都頂唔順, 費事同班後生仔爭啦。
中環仲有好多擦鞋檔, 幫襯者都是西裝友。
嘩, 香港仲有好多政壇"擦鞋仔", 如果一齊嚟開檔一定墟冚過7‧1大遊行。
無語問蒼天!
＜平民大眾＞
撿紙皮盒為生的老婦。 背後櫥窗裏的化妝品跟她無關。最好係掟多啲紙皮盒出嚟。
街頭手錶修理檔, 一隻小木櫃, 撓起腳又可以搵兩餐。
咦, 又有一檔。睇嚟呢行唔算係夕陽行業喎!
住板間戶冇客廳, 去公園坐下一樣咁舒服。
唔係遊艇會、馬會、高爾夫球會會員, 嚟呢度一樣如魚得水, 自得其樂。
執下衫褲、食晏仔、談情、嘆報紙 ... 一樣咁悠閒。
屋村中一間小小的平民化理髮店已經打烊, 店外供客人等候的塑膠椅子在燈光下顯得孤寂。在其他名髪廊「吹剪洗」全套收費可以收幾百塊至過千, 這裡造福草根階層, 只需$45。
盲笛手吹奏得一片樂聲悠揚。唔係搶, 唔係偷拐騙, 都係自食其力啫。
呢兩位好夠jazz味道。有資格去紅館開show。可惜知音人渺, 時不我與。
天星碼頭街頭小提琴手。不過又係冇乜"鍾子期"會欣賞, 一班拖行李箱嘅自由行人士就嫌佢阻住條路。
最偉大係修路工人, 天時暑熱一樣烈陽下開工。放低工作抖下好應該, 大家睇開啲啦。
總不能不食人間煙火吧!
好耐冇食過嘅「經典懷舊糖蔥餅」。真係懷念當年可以用玻璃樽換麥芽糖、噹噹糖嘅年代。
難得放假可以扮靚的家傭。另類的典雅美。
跳鋼管舞跳得幾出色都冇用,
師奶玩手機大過天, 冇眼睇。
香港街頭不乏露天表演。這班中樂師正在準備花旦出場。
王昭君出場前同位宮娥對台詞熱下身。大熱天時仲要披條fur都咪話唔辛苦。
班大嬸同大叔坐定定等大戲開鑼。
浸大門前畢業生戴着方帽子與親朋戚友齊集拍紀念照。雖然係大學生, 不過見好多學生仲好似六歲大細路抱住熊公仔或舉V手勢作天真狀影相。女生仲情有可原, 男生就有點那個了。好多人細過你已經搞革命上戰場喇。
平時要睇主人面色, 放假嚟清真寺輕輕鬆鬆做番自己。
清真寺頂都好熱鬧。
＜未來主人翁＞
無憂無慮、天真無邪的人生階段, 手上最大的喜樂與財富係粒波波糖。長大後未知會否是一雙覆雨翻雲手?
科技魔童? 含着"電子奶咀"的黃毛小子? 我的童年是玩拍公仔紙、彈波子、跳飛機、"捉依因"渡過的。
一家四口餐桌上零交流。天地之大, 全在各人自己手中的iPad。
總感覺手中沒有手機的孩子特別有血有肉, 尤其可愛。或許是我追不上時代吧。
一下子又想起這句: 「一旦羽翼成, 隨風四散飛。」又不知日後花落誰家?
施行身教的媽媽。不過囡囡投訴自己條裙太長。
好安祥的一對小天使。看着他們總感覺世間一切的紛擾鬥爭所謂何事, 何苦由來?
我又想起小時候老師唱遊課上教的一首童謠: 小寶寶, 過馬路, 要小心。見紅燈, 不向前, 見綠燈, 走過去。
軟綿綿, 我多想也撲上去蹦跳翻滾一番啊。為什麼不可以? 可是我不可以。
「好奇、渴望、佔有」...
這一刻在面上流露無遺。
自助餐廳門前的身高量度器。永遠不長高多好啊!
我們也是這樣子走過來的。薪火相傳靠他/她們了。
溜冰場上的小胖溜幾步便溜不動了。要減肥喇!
兒啊, 媽媽只能陪你走一段路。光明在前, 你自己去尋找吧。
＜遊行之城＞
香港已貴為"遊行之城", 團體遊行幾乎無日無之, 各自表述。這裡是尖沙咀廣東道上的反法輪功遊行。
這也算是"自由行"的一類吧。
肥仔, 你反法輪功, 自己條車輪胎都要反下喎。
7‧1遊行我也有去參加。塞咗喺維園半日都唔郁得。
維園旗海
天星碼頭學生團體
身穿「愛爸媽, 愛我家」T-shirt的大嬸們隨歌起舞。喂, 漏咗「愛國家」嗰句喎。
迪士尼電影＜黑魔后＞也不甘後人, 也來搞個露天合唱團湊熱鬧。
＜人生大事＞
普普藝術家安地‧華荷(Andy Warhol)說過: 「In
the future everyone will have their fifteen minutes of fame。」 人生中未必人人都有機會享受15分鐘的榮譽, 不過酒樓婚宴禮堂上掛上自己與愛人的名字, 就算只一個晚上也是夢寐以求的。
站得累了的伴娘團。
最幸福的一天。往後就走着瞧吧。
婚姻是否一個玫瑰花園, 看倆口子是否是稱職的園丁了。
＜裝置藝術＞
雖然有人批評香港是文化沙漠, 但近年來公眾場所似乎多了很多戶外裝置藝術(Installation Art)。有不少是商業性質的擺設, 也有高質素藝術作品。 當中雕塑大師朱銘的便是上乘之作。
疲態畢露。
整裝待發, 準備鎮壓。其中一個係戰地記者。
明明站在前面拍照, 怎麼見不到自己的反影?
維港兩岸之間好像愈來愈窄了, 窄得有如一度幾乎可以涉水而過的河流。97回歸後維水波依舊蕩漾, 霓虹未見褪色, 而這一角的海運大廈與附近的廣東道更見熱鬧。櫛比鱗次的店戶已成一個高檔消費集散站。
尖沙咀海運大廈(海港城)前的通道近年已成了陳列場, 定期展示巨型模型擺設。
除了節日裝飾(如聖誕節), 其他多是電影或運動界人物, 五光十色, 十分熱鬧, 也成了遊人拍照的熱點。
海運大廈前梯級上的"戒賭波"標示。
＜歸於平淡＞
帆船, 曾經是星羅棋佈於維港海面的漁民生計工具, 現已成為歷史陳跡。今天維港仍飄着寥寥無幾的帆船, 點綴着璀璨的城市夜色, 落得一片蒼涼寂寞的身影。
小時候, 多少次經過獅子山腳, 仰望山頭, 看那似像非像的獅子頭, 幻想着牠吼叫的形態。今天又再佇足山腳遙望, 夜色之下, 昔日雄踞大地的獅身已淹在團團燈火中, 只露出頂部的山脊。
多得有心填詞人, 把「獅子山」編入勵志歌曲之中, 象徵我城的精神:
「人生中有歡喜 難免亦常有淚
我地大家在獅子山下相遇上
總算是歡笑多於唏噓
人生不免崎嶇 難以絕無掛慮
既是同舟在獅子山下且共濟
拋棄區分求共對
放開 彼此心中矛盾 理想一起去追
同舟人 誓相隨 無畏更無懼
同處海角天邊 攜手踏平崎嶇
我地大家用艱辛努力寫下那
不朽香江名句 」
別小覷這看似卑微的竹枝,
它是我城經濟"支柱"之一, 多少樓房建築仍有賴它們的"支撐"。
建於1932年的聖德肋撒天主堂仍然屹立, 繼續給信眾提供心靈的滋養。透過這鐡枝之間, 我隱約看到人心的漸淡, 物慾的升騰。
這晚到養和醫院探望住院的岳母。窗下的跑馬地球場在泛光燈下顯得一片孤清, 看來是那麼的細小。 幾名小如螞蟻的夜貓子仍在練球, 讓這片淡綠顯著格外悽清。幾天後岳母去世, 我們趕來見她最後一面。窗下微暗的球場空無一人。生命的過程與終結, 何嘗不是一場球賽, 人去場空。
尖沙咀柏麗大道百年老榕的氣根迎風搖曳, 也不管這喧囂的人間名利場, 悠然地各自吸取天然的養份。
卑微不知名的小草憑着少許的濕氣也在石隙中冒出頭來, 頑強地求生。它未必可以有幸完成生的循環, 但活着的一刻, 它何嘗想放棄?
店舖前的貓咪在食盆旁邊睡得正酣。跟流浪無依以至被虐的貓兒相比, 牠實在是幸福的。
這天碰巧看到雙彩虹(上面一度隱約可見)。許個願, 願我城大家同舟並濟, 無畏更無懼, 排除萬難, 終能擺脫目前困局, 永享這片樂土。
祝各位週末愉快!
